Diqqət!
Saytdan daha rahat istifadə etmək üçün kompyuterlə daxil olmağınız tövsiyə olunur: insakitabi.blogspot.com
Azərbaycanın "Qara qızılı" (Hazır İNŞA)
Azərbaycan zəngin təbii sərvətlərə malikdir. Onun yeraltı, yerüstü təbii sərvətləri dünyanın bir çox ölkələrinə ayaq açmış, öıkəmizin adını şöhrətləndirmişdir. Buna pambıq, çay, qaz, neft və s. kimi təbii sərvətlər aiddir. Bu sərvətlərin içərisində Azərbaycana böyük gəlir gətirən və onun adını dünyada məşhur edən «qara qızılı» diqqəti cəlb edir.
Azərbaycan qədim zamanlardan bəri öz nefti ilə məşhurdur. Hələ eramızdan əvvəl yerdən qalxan təbii qaza və neftə görə bu torpağı «Odlar yurdu» adlandırırdılar. Lakin ölkədə əsl neft partlayışı XIX əsrin sonu XX əsrin əvvəllərinə təsadüf edir. XX əsrin sonuna qədər ölkəmizdə çıxan «qara qızıla» başqa ölkələr havadarlıq edirdilər. Yalnız 1990-cı illərin əvvəllərində ölkəmiz müstəqillik qazandıqdan sonra xalqımız öz təbii ehtiyatlarına sahib çıxa bildi. Belə ki, neftdən əldə olunan gəlir insan kapitalına çevrilir. Neftdən əldə olunan gəlirlər inşa edilən səhiyyə müəssisələrinin, təhsil ocaqlarının tikilməsinə və s. sərf olunur.
Azərbaycan müstəqillik qazandıqdan sonra özünün yeni neft erasına qədəm qoymuşdur. ölkəmizin yeni neft strategiyasını ümummilli liderimiz Heydər Əliyev hazırlamışdır. 1994-cü ildə imzalanmış «Əsrin müqaviləsi» adlanan bu müqavilə nəticəsində Azərbaycana neft gəliriəri gəlir. İndiyədək ölkəmizin neft sənayesinə böyük məbləğdə sərmayə qoyulub, on minlərlə iş yerləri açılıb, qazma qurğuları, platformalar, neft kəmərləri, terminallar kimi mühüm obyektlər inşa edilib, Azərbaycan neftinin dünya bazarına çıxarılmasının yolları, marşrutları təyin edilib, milli sərvətimiz dünya bazarlarına nəql olunur. Bakı-Tiflis-Ceyhan boru kəmərinin inşası ölkəmizin neft ixracı imkanlarını daha da artırırdı.
Yeni neft strategiyası reallaşdıqca Azərbaycanın iqtisadi gücü artır, ordumuz güclənir və respublikamız hər bir sahədə inkişaf edir, qüdrətli bir dövlətə çevrilir.
Hazırda dövlətimizin qarşısında neft gəlirlərini intellektual mülkiyyətə, insan kapitalının inkişafına yönəltmək kimi ali bir məqsəd durur.
Bəli, neft bizim ən qiymətli sərvətimizdir. «Qara qızıl»ın gəlirləri gələcək nəsillər üçün ağ günlər vəd edir.
Azərbaycanın inkişafında neftin rolu (Hazır İNŞA)
Keçmişinə baxıb qürur duyduğum, bu gününə baxıb sevindiyim, gələcəyi uğrunda çalışıb-çarpışdığım, özümü, rahatlığımı tapdığım, azad gəzdiyim sevimli vətənim! Azərbaycan! Qərinələrin otayından boy göstərən, yeri uca dağ zirvəsində olan qədim, gözəl diyar. Uca yaradan heç bir nemətini səndən əsirgəməyib.
Ana yurdumun əlverişli iqlim şəraiti təbiətimizə neçə-neçə çalar qatıb. il boyu minlərlə turisti qoynuna alan başı qarlı dağlarımız, şaqraq çaylarımız, gur çeşmələrimiz, yaşıl ormanlarımız, bol nemətli bağlarımız bu yurdu cənnətməkana çevirib.
Azərbaycan təbii ehtiyatlarına görə dünyanın ən zəngin ölkələri sırasındadır.
Milli sərvətimiz olan neft Vətənimin inkişafında əsas yer tutur. Azərbaycan nefti yüz illər boyu əcnəbilərin inhisarında olub. Neftimiz uğrunda böyük imperiyalar çarpışıb, doğma yurdumun başı bəlalar çəkib. illər boyu bu qiymətli sərvətimizin səmərəsinə həsrət qalmış Vətənim yalnız müstəqillik əldə etdikdən sonra öz neftini dünya bazarına özü çıxarmağa başladı. Yalnız 1994-cü ildən imzalanmış neft müqavilələri xarici şirkətləri Xəzər dənizində yerləşən yataqların işlənməsinə cəlb etdi. Neft layihələri gerçəkləşdi Azərbaycanımızda yaranmış siyasi və iqtisadi sabitlik xalqımızın neft arzularını həyata keçirdi, reallaşdırdı.
«Bakı-Tbilisi-Ceyhan» neft kəməri işə salındı. Neft sahəsində digər uğurlu layihələr həyata keçirildi. Vətənimiz hər il «qara qizıl»ın hasilatından milyardlarla dollar gəlir əldə edir ki, bu da Azərbaycanın çox böyük valyuta ehtiyatıdır.
Milli sərvətimiz olan neftin satışından əldə olunan vəsait hesabına Azərbaycanımız, gözəl Bakımız gündən-günə dəyişir, abadlaşır, inkişaf edir.
Milli sərvətimiz olan neft iqtisadiyyatımizda böyük canlanma və dəyişiklik yaratmışdır. Neftdən gələn gəlir sayəsində əhalinin aztəminatlı təbəqələrinin sosial müdafiəsi güclənir. Ordumuzun qüdrəti artır. Buradan gələn kapitalın hesabına Azərbaycan iqtisadi inkişafın orta tempinə görə dünyanın qabaqcıl ölkələri sırasında addımlayır.
